MAIDER ALZELAI, FINALERA

Maider, finalaurrekoan

Maider Alzelai DOKE ANTZERKI TALDEAREN kidea Ordiziako V Ahozko Narrazio lehiaketan hartzen ari da esku, modu arrakastatsuan, eta datorren ostiralean finalean egongo da. Ahoz Aho, ahozkotasunaren nazio arteko jaialdiaren azken gala da. Eta gure kideak bere artearen erakuspena egingo du publiko adituaren aurrean.

Maiderrek lehiaketa honetarako Fernando Alonsoren “El hombrecito vestido de gris” ipuina hautatu du eta dokekidea euskarazko bertsioa eskaintzen ari da “Grisez jantzitako gizona” izenburuarekin. 

 

Ipuin kontaketarako duen trebetasuna beste bi finalistekin lehiatu beharko du Maiderrek: Ane Gebara gasteiztarra eta Amaia Pagola tolosarra. Hitzordua, gaueko 10etan, Ordiziako Barrena jauregian.

Animo Maider! Zailena egin duzu!

Argazkia: Joxe Otaduy

AURRERA DOA LA CASA DE BERNARDA ALBA

Vene Herrero

DOKE ANTZERKI TALDEAren zuzendaria den Vene Herrero egundoko arrakasta lortzen ari da  "La Casa de Bernarda Alba" obrarekin. Egia esan, aktoresa guztien lana oso ederra da eta hori islatzen da ikuslegoaren erantzunean, orain arteko emanaldi guztietan Bilboko Pabellon 6 (P6) antzokia bete egin baita.

Vene Herrerorekin batera - Bernardaren paperean- Olatz Ganboa, Idoia Merodio, Nagore Navarro, Leire Orbe, Carmen Pardo, Aiora Sedano eta Yannick Vergara bikain ari dira Federico Garcia Lorcaren antzezlan ospetsuaren bertsio berrian, Itziar Lazkanoren zuzendaritzapean.

David Barbero antzerki kritikoak dio bere blogean  ekoizpen honen inguruan:  

"Destacar el serio y concienzudo trabajo realizado por cada una de las actrices en esa construcción del personaje individual y en su contribución al desarrollo coral absolutamente necesario en esta obra. Habría que felicitar a todas y cada una"

Desberdintasuna eta emakumearen aurkako  bortizkeria atzetik datozen modelo kulturalen irrazionaltasunetik elikatzen direla islatzen da Garcia Lorcaren obran, tentsio jarrikian garatutako testu aberatsari esker.

Emanaldiak otsailaren asteburuetan izango dira Bilboko Ribera de Deusto, 47ko P6 antzokian.

Argazkia:P6 antzerki laborategia

BERNARDA ALBA DA VENE HERRERO

VENE HERRERO, DOKE ANTZERKI TALDEAREN zuzendaria, antzerki proiektu eder batean dago sartuta buru belarri. Eta hil honetan bertan estreinatuko dute, Bilbon.

BERNARDA ALBAREN ETXEA dugu egitasmoa, eta hil honen 20an emango da lehen aldiz, Bilboko Zorrozaurreko Pabiloi 6 deritzanean. Hil honetan, 20-21-22, 27-28 eta 29an eskainiko dute. Baita otsaileko asteburuetan ere. Sarrerak Internet bidez lor daitezke, jadanik.

Vene Herrerok Bernarda Albaren papera egiten du. Gainerako aktoresak Olatz Ganboa,  Idoia Merodio, Nagore Navarro, Leire Orbe, Carmen Pardo, Aiora Sedano eta Yannick Vergara ditugu eta zuzendaria Itziar Lazkano da. 

Vene Herrerok azaltzen digu oso erronka interesgarria izan dela berarentzat Federico Lorcaren egintza hau. "Oparia balitz bezala hartu dut" aitortzen du, eta gogora ekarri nahi izan ditu talde osoaren hitzak:

"Pabellón nº 6 Antzerki Laborategira zenbait EMAKUME, antzerkiko profesionalak, bildu gara, BERNARDA ALBAREN ETXEA mirari poetikoak adierazten duen zapalkuntza patriarkal aluaren iraunkortasunaren kontrako oihu iraultzailea jasotzeko. Iragan hurbilerako bidaia, lau belaunalditako jauzia hain zuzen, EMAKUMEAREN AURKAKO DESBERDINTASUN ETA BORTIZKERIAren erroak atzetik datozkigun modelo kulturalen irrazionaltasunetik elikatzen direla ulertzeko. Denok ezagutzen dugu klasiko honen amaierako esaera. Bere alabaren heriotzaren ostean, matriarka handiak betiko irtenbide ergela inposatzen du: “Isiltasuna, isiltasuna esan dut! Isiltasuna…”… Guk horri ezetz esaten diogu"

 

ABADIÑOKO ANTZERKIÑON, AZAROAK 26

Antzerkiño deritzan antzerki zikloaren aurtengo amaieran egongo da DOKE ANTZERKI TALDEA, datorren larunbatean, hilak 26. Azaroaren 5ean ekin zitzaion II. Antzerki Jaialdiari eta bertan arituko DAT "Aingeru ala kurriloi?" antzezlanarekin. 

Abadiñoko Udalak eta Banarte taldeak elkarrekin antolatutako jaialdi honek ezagutzera eman nahi du Euskadiko antzerki talde amateurren lana. Aurtengo edizioan Zallako Antifaz eta Ortuellako Fierabrás taldeak eta Altsasuko Tarima Beltza izan dira orain arteko gonbidatuak. Gazteleraz ihardun dute. Larunbatean DATi dagokio txanda.


Oso aukera edertzat jo dute dokekideek Abadiñoko erakustaldi honetan esku hartzea. Aurreneko aldiz da DAT jaialdi batean gonbidatu moduan aritzen dela. 

Hitzordua, beraz, Abadiñoko Errota Kultura Etxean, larunbata 26, arratsaldeko 8etan.

ESKORIATZAN, IGANDEAN, AZAROAK 20.

Datorren igandean, azaroak 20, DOKE ANTZERKI TALDEAk bere obra "Aingeru ala kurriloi?"eskainiko du Eskoriatzako Zaldibar Antzokian. Arratsaldeko 7etan izango da emanaldia. Oraingo hau da DATek Eskoriatzan egiten duen lehen agerraldia.

DATen agendan azaroaren 26 agertzen da Eskoriatzaz osteko hurrengo emanaldia, Abadiñoko Antzerkiño topaketen barruan.

IGANDEAN, DOKE ANTZERKI TALDEA ARRASATEN

Urte batzuk eman dira Dorita Murgiak bere lehen antzezlanean parte hartu zuenetik. Hortxe daukagu, argazki historiko batean, ikaslea zela. Eskaileratxo batera igota, jaten ematen diote, antzerkigintzan haziko den esperantzan.

Eta argi asko utzi zuen aspaldi hazi zela, "Aingeru

ala kurriloi?" obran erakusten den moduan. Arte dramatikoan hazi, bai Doritak eta baita antzezpenean laguntzen dioten Mariasun Pagoaga, Arantza Ezkurra eta Maider Alzelaik ere. 

Taldearen hurrengo emanaldia datorren igandean izango da, azaroak 6, Arrasateko Amaia antzokian, arratsaldeko 7´30etan. Sarrerak salgai daude, 10eurotan.

Argazkiak: Dorita Murgia, DAT

AZAROAREN 6, ARRASATEKO AMAIAN

Berriro ere agertokira. Udako etenaren ostean, DATeko lagunak prest daude "Aingeru ala kurriloi?" obrari berriz ere ekiteko.

Arrasateko Amaia antzokia izango da bigarren aldiz taldearen ekoizpena hartuko duena, azaroaren 6an, arratsaldeko 7´30etan.

Dagoeneko sarrerak salgai daude honako helbide honetan,

https://ticket.kutxabank.es/amaiaarrasate/public/janto/

Eta baita antzokiko lehiatilan ere eskura daitezke. Prezioa: 10 euro.

Iragan ekainaren 19an toki berean ekinda gero, honela ikusi zuen obra, Jaime Valverde Garako antzerki kritikoak: 

"Teatroa seriotasun itzelez bizi duen artista talde baten egikera da; eta batez ere, herri antzerkiaren maitasuna eta baldintzarik gabeko leialtasuna, edozein teatro sistemaren oinarria izan behar dena"


http://dokeantzerkitaldea.blogspot.com.es/2016/06/antzerkiari-emanak.html