ARTISTA HANDIAK

Xabi, Maider eta Itziar

DOKE ANTZERKI TALDEAK oso maila altua eman du Dulantziko 17. Antzerki Amateurraren Jaialdian, iragan larunbatean azken jardunaldia bizi izan zuena, sari banaketarekin.

Bederatzi ziren estatu osoko taldeak, eta dokekideek garbi erakutsi dute antzezle bikainak direla. Azaroaren 10eko euren saioan arrasatearrek sekulako emanaldia borobildu zuten eta horrela ikusi zuten epai mahaiak eta publikoak ere. Suposa daitekeen bezala, hautaketarako aurkeztutako laurogeita hamar taldeetatik aukeratuak izatea, soilik, dokekideentzat saria zen. Euskaraz aritu ziren bakarrak izatea ere ez zen nolanahiko aitorpena. Eta horretan oinarrituta, Arrasateko taldea bikain aritu zen.

Azkenik, Arrasatera saririk ekarri ez duten arren, oso pozik itzuli dira… azken unera arte sariak hatzamarrekin ukitu baitituzte. Honakoa izan da emaitza, DAT-ri dagokionez:

Bigarren mailako emakume-aktore onenaren finalista: Itziar Rosado

Emakume-aktore onenaren finalista: Maider Alcelay

Gizon-aktore onenaren finalista: Xabier Latorre

Taldeak maila ona eman badu, zer esanik ez epai mahaiaren iritziz finalista izateko nabarmendu ziren hiru dokekideei dagokienez. Antzerki amateurraren antzezle apartatzat har daitezke.

Zorionak Doke Antzerki Taldeari, Vene Herrero zuzendaria buru.

Argazkiak: Joxe Otaduy

BIKAIN

Emanaldi bikaina gertatu zen atzo DOKE ANTZERKI TALDEAk Dulantzin eskainitakoa. 17. Antzerki Amateurraren Jaialdiaren barruan atzo zegokien dokekideei aritzea Txema Blasco Auditoriumean eta  aparteko saioa borobildu zuten taldekideek eszenategian.

Jaialdiak azaroko hiru asteburutan zehar garatzen ari da - estatuko beste horrenbeste talde amateurrekin-, eta arrasatearrak atzo ostiralerako zeuden programatuta. Emanaldiaren amaieran hiru bider atera behar izan zuten antzezleek agurtzera, publikoak xalo zaparrada handi batekin sarituta.

Azken gala azaroaren 25ean izango da, eta bertan jaialdiko sariak banatuko dira.

Alea jacta est.

DOKE: AZAROAK 10. DULANTZIN

 

Azaroaren 10ean, arratsaldeko 7´30etan DOKE ANTZERKI TALDEAk bere obra eskainiko du Arabako Dulantzin, 17. Jaialdiaren barruan. Estatu osoko beste zortzi talderekin lehiatzen dira dokekideak. "Hemen ez du inork ordaintzen" obra da jaialdian izango den euskarazko antzezlan bakarra.

ZATOZTE GUREKIN!!!!

Autobusa jarri dugu, Arrasatetik arratsaldeko 5´30etan aterako dena.

Autobusa eta antzerki-sarrera DOAN.

Apunta zaitez, 665 118 572 zenbakian 

DOKE ANTZERKI TALDEA, DULANTZIKO 17. JAIALDIAN

DOKE ANTZERKI TALDEAk Arabako Dulantziko Amateur Antzerki 17. Jaialdian arituko da azaroaren 10ean, “Hemen ez du inork ordaintzen” obrarekin

Jaialdi-lehiaketa formulapeko topaketa honetan esku hartzeko hautaketa prozesu bat jasan dute dokekideek estatu osoko beste laurogeita hamar talderekin batera.

Azkenik bederatzi talde hautatu dute finalerako, Madril, Valentzia, Alacant, Castellon, Pontevedra, Bilbo eta Gasteizko banarekin lehiatu beharko dutelarik dokekideok.

Euskarazko obra bakarra da DATena, eta horrek egundoko garrantzia ematen die arrasatearroi, gure hizkuntza lan eta jolas lanabestzat hartu baitzuten duela hogei urte antzerki sortzeari ekin ziotenean eta horri eutsi diote zintzo.

Azaroaren 10ean eskainiko du obra DATek, arratsaldeko 7’30etan, Dulantziko Txema Blasco Kultura Etxeko auditoriumean. Eta azaroren 25ean jakinaraziko da epai mahaiaren erabakia.

DATek dagoeneko saria lortu du: Dulantzin estatuko beste zortzi talde indartsuren artean arituko da; eta euskaraz.

 AUTOBUSA ANTOLATU DA DULANTZIRA DOAN JOATEKO

Interesatuek dei dezatela edota whatsapp 665 118 572 telefonora; baita dokeikastaroak@gmail.com helbidera apuntatuz

 

DOKE ARETXABALETAN, URRIAREN 8an

 

Urriaren 8an, Aretxabaletako Zaraia aretoan; arratsaldeko 7etan

Egilea:  Dario Fo

Itzulpena: Josemari Velez de Mendizabal
Zuzendaria: Vene Herrero
Antzezlariak: Maider Alcelay, Itziar Rosado, Xabi Latorre, Garbiñe Nuñez, Arantza Ezkurra, Mariasun Pagoaga, Itsaso Nuin, Asier Alonso.

• Eguna: Urriak 8, domeka
• Ordua: 19:00
• Lekua:Zaraia aretoa
• Prezioa: 5 euro

HEMEN EZ DU INORK ORDAINTZEN. Estreinaldi arrakastatsua

Ekainaren 2.  Arrasateko Amaia Antzokira Dario Fo agertu da, DOKE ANTZERKI TALDEAren eskutik. Modu arrakastatsuan. Ia berrogeita hamar urte idazle italiar Nobel saridunak idatzi ondoren, Josemari Velez de Mendizabalen euskarazko bertsioan ikusi ahal izan da "Hemen ez du inork ordaintzen" antzezlana, berezko ekoizpen xume baina bizian.

"Hemen ez du inork ordaintzen" izan da azken hilabeteotan dokekideek prestatutako antzezlana eta atzo ostiralean eskaini zuten lehen emanaldia.

Antzezleak fin aritu ziren euren paperetan eta publikoak une goxoak eman zituen obraren intentsitatearekin identifikatuta. Txalo zarta ugari eskaini zitzaizkien aktore-aktoresei, eta barre algarak entzun ziren.

Xabi Latorre eta Maider Alcelay bikotearen joko eszenikoak bide eta babes eman zien Itziar Rosado,  Garbiñe Nuñez, Arantza Ezkurra, Mariasun Pagoaga, Itsaso Nuin eta Asier Alonso beste kideei.

Vene Herrero zuzendaritzapean DATen ibilbideak maila garaiagoak heldu ditu. Eta oraingo ekarpen honek egiaztatu egin du taldearen balioa.

Aurkezpen honen ostean, Doke Antzerki Taldeak irailean ekingo dio obra honen zirkuituari.

Argazkiak: Joxe Otaduy, DAT

HEMEN EZ DU INORK ORDAINTZEN

Obra berri batekin dator DOKE ANTZERKI TALDEA eszenatokietara. Lau urte luze dira azken antzezlana eskaini zuela eta benetan luze egin zaie DATeko kideei agertokietara igo ez izana. Baina azken urtean zehar prestatutako ekarpena ekainaren 2an estreinatuko dute. 

Oraingoan taldeak nazioarteko obra ospetsu batera jo du, eta Dario Fo italiarraren "Hemen ez du inork ordaintzen" (Non si paga, non si paga!) hautatu dute publikoaren aurrera azaltzeko. Honakoa da, obraren fitxa teknikoa:

EGILEA: Dario Fo / ITZULPENA: Josemari Velez de Mendizabal / ZUZENDARIA: Vene Herrero / ANTZEZLARIAK: Maider Alcelay, Itziar Rosado, Xabi Latorre, Garbiñe Nuñez, Arantza Ezkurra, Mariasun Pagoaga, Itsaso Nuin, Asier Alonso, Marga Merkader.

Antzezlana 1974an estreinatu zuen Dario Fok eta bi etxekoandre xumek hileko amaierara iristeko dituzten arazoak aurkezten ditu. Horietako bat supermerkatu batera sartu eta ahal duen guztia eramaten du ordaindu gabe. Gero bi andreek, lapurretaz inor kontura ez dadin, plan bat asmatzen dute, gero eta nahasiagoa, senarrak ere konplize bihurtzeraino.

Obrarako kartela Eneritz Tirados diseinatzailearena da.

Arrasateko Amaia antzokian izango da estreinaldia, ekainaren 2an, arratsaldeko 7´30etan. DATek Musakolako 2023ko jai egitarauan sartu nahi izan du  obra, auzoko jaien mendeurrena giro alai eta solidarioan ospatu guran.

Irailetik aurrera beste eszenategitara eramango da obra.

DOKE ANTZERKI ESKOLAKO IKASLEEN LAN BERRIA: SAGUTEGIA

 

DOKE ANTZERKI ESKOLAko ikasleek obra bat eramango dute Amaia Antzokiko eszenategira datorren asteartean, hilak 23. Ez dira lehen aldiz tamainako agertokira igotzen direla baina aukera honetan nazioarteko antzezlan batekin datozkigu DAEko ikasleak: Agatha Christieren "Sagutegia". Maider Alcelay irakasle eta aktoresa arduratu da muntaketa honen zuzendariaz.

Arratsaldeko 6´30etan da hitzordua. Sarrerak, doan, antzokian bertan eskura daitezke.  Lerro hauetatik deialdi berezia egin nahi da, Arrasateko antzerki zale guztioi, bertara daitezen. Antzerki tokiko eskaintza aberasten eta egonkortzen ari da eta bide honetatik segituz laster gazte horiek lantegi handiagoetarako gertu egongo dira.

Antzezlariak: Ariana Nespereira, Zihara Etxebarria, Olaia Urzelay, Ane Mujika, Nagore Osa, Haizea Alvarez, Rodrigo Nunes, Gari Sarasua.

Obraren egokitzaile eta zuzendaria: Maider Alcelay

Kartela: Dani Nespereira

Iraupena: 40´

Maiatzaren 23ko emanaldiari beste batek jarraituko dio ekainaren 8an, antzezle ikasle desberdinekin.

Diogun, halaber, astearteko eskaintza borobiltzeko, Eskolako gaztetxoek - 10 eta 13 urte artekoak- "Liburutegiko sekretuak" titulatu duten euren obra eszenifikatuko dutela.

Beraz, antzerki zaleok badugu aitzakia Amaia Antzokira bertaratzeko.