miércoles, 23 de noviembre de 2016

ABADIÑOKO ANTZERKIÑON, AZAROAK 26

Antzerkiño deritzan antzerki zikloaren aurtengo amaieran egongo da DOKE ANTZERKI TALDEA, datorren larunbatean, hilak 26. Azaroaren 5ean ekin zitzaion II. Antzerki Jaialdiari eta bertan arituko DAT "Aingeru ala kurriloi?" antzezlanarekin. 

Abadiñoko Udalak eta Banarte taldeak elkarrekin antolatutako jaialdi honek ezagutzera eman nahi du Euskadiko antzerki talde amateurren lana. Aurtengo edizioan Zallako Antifaz eta Ortuellako Fierabrás taldeak eta Altsasuko Tarima Beltza izan dira orain arteko gonbidatuak. Gazteleraz ihardun dute. Larunbatean DATi dagokio txanda.


Oso aukera edertzat jo dute dokekideek Abadiñoko erakustaldi honetan esku hartzea. Aurreneko aldiz da DAT jaialdi batean gonbidatu moduan aritzen dela. 

Hitzordua, beraz, Abadiñoko Errota Kultura Etxean, larunbata 26, arratsaldeko 8etan.

lunes, 14 de noviembre de 2016

ESKORIATZAN, IGANDEAN, AZAROAK 20.

Datorren igandean, azaroak 20, DOKE ANTZERKI TALDEAk bere obra "Aingeru ala kurriloi?"eskainiko du Eskoriatzako Zaldibar Antzokian. Arratsaldeko 7etan izango da emanaldia. Oraingo hau da DATek Eskoriatzan egiten duen lehen agerraldia.
DATen agendan azaroaren 26 agertzen da Eskoriatzaz osteko hurrengo emanaldia, Abadiñoko Antzerkiño topaketen barruan.


jueves, 3 de noviembre de 2016

IGANDEAN, DOKE ANTZERKI TALDEA ARRASATEN

Urte batzuk eman dira Dorita Murgiak bere lehen antzezlanean parte hartu zuenetik. Hortxe daukagu, argazki historiko batean, ikaslea zela. Eskaileratxo batera igota, jaten ematen diote, antzerkigintzan haziko den esperantzan.

Eta argi asko utzi zuen aspaldi hazi zela, "Aingeru
ala kurriloi?" obran erakusten den moduan. Arte dramatikoan hazi, bai Doritak eta baita antzezpenean laguntzen dioten Mariasun Pagoaga, Arantza Ezkurra eta Maider Alzelaik ere. 

Taldearen hurrengo emanaldia datorren igandean izango da, azaroak 6, Arrasateko Amaia antzokian, arratsaldeko 7´30etan. Sarrerak salgai daude, 10eurotan.

Argazkiak: Dorita Murgia, DAT

martes, 1 de noviembre de 2016

AZAROAREN 6, ARRASATEKO AMAIAN

Berriro ere agertokira. Udako etenaren ostean, DATeko lagunak prest daude "Aingeru ala kurriloi?" obrari berriz ere ekiteko.

Arrasateko Amaia antzokia izango da bigarren aldiz taldearen ekoizpena hartuko duena, azaroaren 6an, arratsaldeko 7´30etan.

Dagoeneko sarrerak salgai daude honako helbide honetan,



Eta baita antzokiko lehiatilan ere eskura daitezke. Prezioa: 10 euro.

Iragan ekainaren 19an toki berean ekinda gero, honela ikusi zuen obra, Jaime Valverde Garako antzerki kritikoak: 

"Teatroa seriotasun itzelez bizi duen artista talde baten egikera da; eta batez ere, herri antzerkiaren maitasuna eta baldintzarik gabeko leialtasuna, edozein teatro sistemaren oinarria izan behar dena"


http://dokeantzerkitaldea.blogspot.com.es/2016/06/antzerkiari-emanak.html


miércoles, 22 de junio de 2016

ANTZERKIARI EMANAK

Antzerkiari emanak
“Aingeru ala kurriloi?”
Taldea: Doke Antzerki Taldea


Testua: Josemari Velez de Mendizabal
Zuzendaria: Vene Herrero
Antzezleak: Mariasun Pagoaga, Arantza Ezkurra, Maider Alzelay, Dorita Murgia.


Jaime Valverde
Gara, 2016-06-21

Zazpigarren obra du Doke Antzerki Taldeak bere 12 urteko ibilbidean. Zalantzarik gabe, merituzko curriculuma herri antzerkiko talde batentzat. Eta, agian, ibilbide luze horri dagokio oraingoan aurkezten duten obra honekin erabat aldendu izana herri teatroari suposatzen zaion eitetik.


Izan ere "Aingeru ala kurriloi?" lanean ez dugu topatuko publikoaren konplizitatea eta barrea bilatzen dituen ohiko tonu komiko herrikoia. Horren ordez istorio ilun eta latz bat kontatzen digute, familia barruan gerta daitekeen ezbeharren berri ematen duena.

Lehendabiziko momentutik giro klaustrofobikoa eskaintzen zaio ikusleari, bi emakume adinduren bizimodu ihartuan murgilduz. Urteetako ohikeriak eta beren arteko tirabirek bizi diren etxearen atmosfera erabat kutsatzen dute.

Ekintza dramatikoa pizten da iloba ezezagun bat agertzen denean, iraganeko gertakari desatseginak orainaldira ekarriz. Pertsonaia uherreko antzezlan honetan gauzak ez dira lehen begiratuan diruditen bezalakoak, eta gertakariak ere ez dira espero bezala kateatuko.


Jokatzean eta eszenaratzean antzerkiari dedikazio murriztua besterik eskaini ezin dioten zaleen zantzuak antzematen dira, baina aldi berean, teatroa seriotasun itzelez bizi duen artista talde baten egikera; eta batez ere, herri antzerkiaren maitasuna eta baldintzarik gabeko leialtasuna, edozein teatro sistemaren oinarria izan behar dena.

Argazkia: DAT

martes, 21 de junio de 2016

ZURI-BELTZEKO OBRA



MONDRABERRIko Gontzal Landak idatzia, 16-06-20an:
"Antzezlana 50.-60. hamarkadako etxe batean giroturik dago, giro gris batean, eta bertan bi ahizpa (elkarrekin) bizi dira.


Obra isilune luze batekin hasten da, bi senideen arteko inkomunikazioa islatuz, eta emanaldian zehar isilune esanguratsuak izaten dira. Bi emakumeen arteko harremanak urriak eta garratzak dira, gordinegiak eta maitasun adierazpenek ez dute tokirik, urrunekoak.
Harremana, gainera, okertu egiten da bat-batean beraien ahizparen alaba (Itaca izenekoa) etxean azaltzen zaienean.

Obra dramatikoa da, ez bilatu bertan barre errrazik, eta zer pentsatua ematen du, hausnarketarako bidea ematen digu"



 

lunes, 20 de junio de 2016

AMAIA ANTZOKIAN

Arrasateko Amaia antzokiak hartu zuen ekainaren 19ko arratsaldean DATen emanaldi berria, Josemari Velez de Mendizabal dokekidearen  "Aingeru ala kurriloi?" obrarekin. Horixe izan da uda aurreko azken saioa, taldeak eten egiten baitu urrira arte.
DATen programazioaren arabera, Amaia antzokira udazkenean itzuliko dira obra berdinarekin, nahiz eta oraindik data zehatza jarri gabe dagoen.  

Eskerrik asko, orain arteko emanaldietan gurekin egon zareten guztioi. Zuengatik ari gara antzerkian!
 
Fernando eta Vene, argiztapen eta zuzendaritza lanetan

Maider Alzelai, Itaka lobaren paperean

Mariasun Pagoaga, izeba Miren

Arantza Ezkurra eta Mariasun Pagoaga, Anjela eta Miren ahizpak

 Dorita Murgia eta Maider Alzelai, Dina ahizpa eta Itaka loba

Arantza Ezkurra, Anjela ahizpa

Maider Alzelai

Aldageletan, saioari ekin aurretik

Argazkiak. DAT

viernes, 17 de junio de 2016

AINGERU ALA KURRILOI? ARRASATEN, IGANDEAN

DATek Arrasaten eskainiko du bere "Aingeru ala kurriloi?" antzezlana, datorren igandean, ekainak 19,arratsaldeko 8etan. Hauxe izango da uda aurreko azken saio publikoa. Taldea urrian itzuliko da antzeztokietara.

 Igandeko sarrerak Amaia Antzokiko takilan eros daitezke.









Obrari buruz gehiago: